जनताको गुनासो प्रत्यक्ष सुन्न गत बिहीबार प्रधानमन्त्री बाबुराम भट्टराईले कार्यालयमै 'हेलो सरकार' कक्ष सञ्चालन गरे । शुक्रबार जनकपुरस्थित एक परीक्षा केन्द्रमा चिट चोरिरहेको भन्ने गुनासो आयो । प्रधानमन्त्रीले उक्त परीक्षा केन्द्रमा भइरहेको चिट चोराउने कार्य तत्काल रोक्न निर्देशन दिए । निर्देशन गर्नेबित्तिकै कडाइकासाथ चिट चोराउने कार्य रोकियो पनि ।
दोस्रो दिन स्नातकोत्तर तह मानवशास्त्र समाजशास्त्र विषयको प्रथम वर्षको परीक्षा दिनका लागि प्रवेशपत्र नपाएकी पुल्चोककी कृष्णा पौड्यालले ११११ मा फोन गरी आफ्नो अप्ठ्यारो सुनाइन् । शनिबार दिनभर हेलो सरकारले उनलाई परीक्षा दिलाउन सम्बन्धित निकायमा ताकेता गरिरह्यो ।
'विश्व विद्यालयका कर्मचारीले प्रवेशपत्रबिना परीक्षा दिन नपाउने भनेपछि आत्तिएर हेलो सरकारमा फोन गरेँ,' कृष्णाले भनिन्, 'कर्मचारीको लापरबाहीले प्रवेशपत्र हराएको गुनासो गरेपछि हेलो सरकारले तत्काल परीक्षा दिने वातावरण मिलाइदियो ।' प्रवेशपत्र उपलब्ध गराइदिन चार दिनदेखि सबै सम्बन्धित निकायलाई आग्रह गर्दा सुनुवाइ नभएको विषय हेलो सरकारबाट तुरुन्तै सुनुवाइ भएको उनले बताइन् ।
शनिबार राति एक युवकले डीभी भर्ने काममा अनियमितता भएको भन्दै न्युरोडबाट फोन गरे । गत १९ गते राति १२ बजेसम्म डीभी भर्ने समय थियो । 'न्युरोडको खिचापोखरीमा रहेको 'इ स्पट' ले समय सकिएपछि डीभी भरेर प्रत्येक व्यक्तिबाट दुई सय पचास लिइरहेको सूचना आएको थियो' हेलो सरकार कक्षका उपसचिव ज्ञानराज पाण्डेले भने, 'तुरुन्त प्रमुख जिल्ला अधिकारीलाई जानकारी गरायौं, उहाँले रातारात कर्मचारी परिचालन गरी इस्पट छानबिन गर्न लगाउनुभयो । तर छानबिन पछि अनियमितता भएको पाइएन ।'
आइतबार दिउँसो अनामनगरस्थित गोरखा एफएम नजिकै आगलागी भएको र सहयोग गर्न आग्रह गर्दै प्रधानमन्त्री कार्यालयको फोन बज्यो । कक्षमा खटिरहेका कर्मचारीले तुरुन्तै प्रहरी कन्ट्रोलमा फोन गरी दमकल पठाए । 'आधा घन्टा नबित्तै स्थानीयवासीले दमकल आइपुग्यो धन्यवाद भन्दै फोन गरे' कक्षका शाखा अधिकृत जयनारायण आचार्यले खुसी हुँदै सोमबार कान्तिपुरलाई भने, 'हेलो सरकारले जनताको गुनासो लिनेमात्र होइन राहत पनि दिइरहेको छ ।'
हेलो सरकारमा देशभरबार आएको जनताको गुनासो टिपेर कारबाही प्रक्रिया अगाडि बढाउने काम भइरहेको उपसचिव पाण्डेले जानकारी गराए । उनका अनुसार स्थापनापछि चार दिनभित्र आएका सबै जसो मुद्दाको सुनुवाइ प्रक्रिया अगाडि बढाइएको छ । टेलिफोन, फ्याक्स र इमेलमार्फत कक्षमा दैनिक दुई सय गुनासो आउने गरेका छन् ।
उनका अनुसार कसैको ज्यानै जाने, सरकारमा ठूलो हानि नोक्सानी हुने, शान्ति सुरक्षामा आउने, विद्यार्थीको भविष्यमा खेलवाड हुने जस्ता सूचनाको तत्काल कारबाही गरिएको हो । अन्य सूचना र गुनासोको सुनुवाइका लागि सम्बन्धित मन्त्रालयमा पठाइएको छ । जनताको गुनासो मुख्य सचिवमार्फत प्रधानमन्त्रीसम्म पुर्‍याउने उनले जानकारी दिए । उनले गुनासोबारे जानकारी लिन मुख्य सचिव माधव घिमिरे दैनिक कक्षमा आउने गरेकोसमेत बताए
देशभरबाट विभिन्न किसिमका गुनासो आइरहन्छन् । हेलो सरकारमा सेना समायोजन, भ्रष्टाचार, ठगी, सडक, पुल नबनेको, अस्पतालमा उपचार नपाएको, विश्वविद्यालयमा पडाइ नभएको, शान्ति सम्झौता, सार्वजनिक चासोका विषयमा गुनासो आउने गरेका छन् ।
कक्षमा प्रत्येक मन्त्रालय, योजना आयोग, अख्तियार दुरुपयोग अनुसन्धान आयोगलगायत संवैधानिक निकायका फाइलहरू राखिएका छन् । 'आएका उजुरीको सम्बन्धित मन्त्रालयलाई कारबाही गर्न निर्देशन गछौर्ं,' सहसचिव शंकरप्रसाद अधिकारीले भने ।
हेलो सरकारलाई व्यवस्थापन गर्न सरकारले २४ सै घन्टा कर्मचारी खटाएको छ । तीन समूहमा विभाजन गरेर १८ कर्मचारी खटाइएको छ । राति खट्ने कर्मचारीलाई सुत्नका लागि प्रधानमन्त्री कार्यालयको एउटा कोठामा दुईवटा बेड, ओड्ने, ओच्छ्याउने, पिउनेपानीको व्यवस्था गरिएको छ ।
२०६८ कार्तिक २२, ekantipur