इटहरी, १६ मंसिर
ट्राफिक प्रहरीलाई झुक्याएर सवारी नियम मिच्दै सवारी चलाउने चालकहरु अब सचेत हुने बेला भएको छ । प्रहरीलाई झुक्याएँ भन्दै खुसी हुने समय अब चाँडै नै समाप्त हुँदैछ ।
ट्राफिक व्यवस्थापनलाई चुस्त बनाउनका लागि तथा बढ्दो आपराधिक गतिविधि नियन्त्रण गर्न पुर्वाञ्चलको विभिन्न स्थानहरुमा सीसीटीभी जडान गर्नेबारे पुर्वाञ्चल क्षेत्रीय ट्राफिक कार्यालयले तयारी थालेको छ ।
ट्राफिक कार्यालयका पुर्वाञ्चल प्रमुख डिएसपी विमल बस्नेतले पुर्वाञ्चलको विराटनगर र इटहरीमा सुनसरीको इटहरीका विभिन्न स्थानहरुमा सीसीटिभी जडान गर्न लागिएको जानकारी दिए ।
१७ लाख रुपैयाको लागतमा मोरङको विराटनगरमा एक दर्जन सीसीटिभी जडान गर्ने तयारी भइसकेको जानकारी दिँदै बस्नेतले इटहरीमा समेत प्रारम्भिक रुपमा चार स्थानमा सीसीटिभी जडान गर्न लागिएको र सोको लागि नागरिक समाज, प्रहरी, दलहरुसँग छलफल थालिएको समेत जानकारी दिए । प्रारम्भिक रुपमा दुई वटा शहरहरुमा गरीएको यो व्यवस्था सफल भएमा अन्य शहरहरुमा समेत लागु गरिने जानकारी दिए ।
क्यामेराले तीव्र गतीमा कुदेको सवारीको समेत नम्बर स्पष्ट रेकर्ड गर्न सक्ने हुँदा ट्राफिक नियम उल्लंघन गर्ने तथा आपराधिक गतिविधी गर्ने सवारी साधन तथा व्यक्तिकोृ पहिचान गर्न सहयोग हुने जनाइएको छ । ‘इटहरी चौकको कुन कुनामा कस्तो घटना घट्यो भनेर एउटै कोठाबाट अनुगमन गर्न सकिने हुँदा सिसिटिभी आजको आवश्यकता बनेको छ ।’ बस्नेतले भने ।
हल इटहरीको चौक क्षेत्रको अनुगमनकालागि गोरखा डिपार्टमेन्ट स्टोरले स्टोर भवनमा राखेको सिसिटिभीलाई नै इटहरीका सुरक्षा निकायहरुले प्रयोग गरिरहुेका छन् । नयाँ जडान गरिने सीसी टिभीलाई सुरक्षा निकायहरुले आफ्नो इच्छानुसार प्रयोग गर्न सकिने हुँदा बढी प्रभावकारी हुने जनाइएको छ ।
विहीबार इटहरीमा आयोजना गरीएको नगरस्तरीय सर्वपक्षीय बैठकले सुरक्षा व्यवस्थालाई प्रभावकारी बनाउन गरिएको प्रस्तावलाई सहयोग गर्ने जनाएको छ । इटहरी नगरपालिकाका कार्यकारी अधिकृत गणेश दाहालले सुरक्षा व्यवस्था प्रभावकारी बनाउनको लागि सीसीटिभीले सहयोग गर्ने विश्वास व्यक्त गरे । उनले सबैको सहयोग भएमा सीसीटिभी जडान गरेर नगरविकासका कामलाई समेत व्यवस्थित बनाउन सकिने बताए ।
यता उपभोक्ता मञ्चका नगर अध्यक्ष नारायणबहादुर श्रेष्ठले सीसीटिभी जडान गरेपछि आपराधिक घटना घट्ने बताए । सीसीटिभीको क्षेत्रभित्र गरिएका गतिविधि रेकर्ड हुने भएकाले नराम्रा कार्यहरु निरुत्साहित हुने जनाए ।
नागरिक समाजका नगर अध्यक्ष जगदीश वलीले प्रस्ताव राम्रोृ भएकाले उद्योगी, व्यवशायी तथा नागरिकको सहयोग जुट्ने विश्वास व्यक्त गरे । सीसीटिभी जडान गर्ने ट्राफिक कार्यालयको प्रस्तावलाई विभिन्न क्षेत्रका व्यक्तिहरुले स्वागत गरेका छन् । केही दिनभित्रै क्यामेराको लागत विवरण तयार पारी निर्णय गरिने बस्नेतले बताए ।
यातायात कार्यालयको अधिकार अब ट्राफिकलाई
अबदेखि ट्राफिक नियम उल्लंघन गर्ने सवारी चालकलाई ट्राफिक प्रहरीले पाँच हजार सम्म जरिवाना गर्नसक्ने अधिकार पाएको छ । डिएसपी बस्नेतले मेची, कोशी र सगरमाथा अञ्चलका यातायात व्यवस्था कार्यालयको संयुक्त बैठकले ट्राफिक प्रहरीलाई सो अधिकार दिएको जानकारी दिए । यस अघिसम्म पचास रुपैया देखि दुई सय रुपैयासम्म मात्र जरिवाना गर्ने अधिकार ट्राफिक कार्यालयलाई थियो । जरिवाना न्युन भएका कारण नियम उल्लंघन गर्ने क्रम नरोकिएकोले अधिकार मागिएपछि यातायात कार्यालयले आफ्नो अधिकार प्रहरीलाई दिएको हो । पक्राउ गरिएका सवारी साधनहरुबाट अधिकतम जरिवाना तिराउन यातायात व्यवस्था कार्यालयलाई बुझाउनुपर्ने नियम थियो । यातायातले अधिकतम पाँच हजार रुपैयासम्म जरिवाना तिराउन सक्ने प्रावधान रहेकोृमा अब ट्राफिक प्रहरीले नै जरिवाना तिराउने अधिकार पाएपछि जरिवाना असुली अझ प्रभावकारी रुपमा अघि बढाइने बस्नेतले बताए ।
विहीबारको बैठकमा नागरिक समाजका वलीले ब्रेथलाइजरको प्रयोग गरी सवारी चालकले मादक पदार्थ खाए नखाएको जाँच गर्न समेत ट्राफिक प्रहरीलाई अनुरोध गरेका थिए । जवाफमा डिएसपी बस्नेतले मादक पदार्थ खाएर सवारी चलाउनेलाई गर्न सकिने कारवाहीको बारेमा नियममा उल्लेख नभएका कारण समस्या उत्पन्न भएको जानकारी दिए ।
यस्तै सवारी ऐनमा नै नरहेको तीन पाङ्ग्रे ‘बसन्ती’ सञ्चालन रोक्नुपर्ने माग समेत बैठकमा गरिएको थियो । सुनसरीमा निर्वाध सञ्चालन भइरहेका वसन्तीको सञ्चालन रोक्नको लागि प्रमुख जिल्ला अधिकारीले नै साहस नदेखाएका कारण केही गर्न नसकेको बस्नेतले जवाफ दिएका थिए । नियमविपरीत सञ्चालन गरिएका वसन्ती सञ्चालन रोक्न प्रमुख जिल्ला अधिकारीले आदेश दिएमा तत्काल सबै सवारी नियन्त्रणमा लिइने समेत बस्नेतले प्रतिबद्धता जनाए ।