'यो ठाउँमा दिनैजस्तो दुर्घटना हुन्थ्यो ।’ मोरङको लक्ष्मीमार्गस्थित चिसाङ भाङबारी केशलिया पुलनजिकको सडक खण्ड देखाउँदै स्थानिय खगेन्द्र गौतमले भने, ‘हात, खुट्टा छरपष्ट हुनेगरी मानिस मर्थे ।’
हप्तैपिच्छे कोही न कोही सडक दुर्घटनामा परेको तथा मृत्यु भएको सुन्नुपर्ने अवस्थालाई समाधान गर्न स्थानियहरु मन्दिर बनाउन जुटे । दैवी शक्तिको कारण दुर्घटना र मानिस मर्ने क्रम बढेको अनुमान स्थानियको थियो । दुर्घटना बढेपछि गत वर्ष पुराणमार्फत् रकम संकलन गरी मन्दिर बनाए । ‘मन्दिर बनाएपछि दुर्घटना निकै कम भएको छ ।’ मन्दिर निर्माण समितिका अध्यक्ष समेत रहेका गौतमले भने ।
गौतमका अनुसार मन्दिर बनाएपछि सो ठाउँमा साना तिना दुर्घउटना बाहेक मानिसको ज्यान नै जानेगरी दुर्घटना भएको छैन । अघिल्ला वर्षहरुमा महिनामा कम्तिमा एक जनाको मृत्यु हुनेगरी दुर्घटना हुने सो स्थानमा मन्दिर बनाएदेखि दुर्घटनाबाट कसैको पनि ज्यान नगएको स्थानियको भनाई छ ।
सवारी साधनहरुको संख्यामा निरन्तर वृद्धि तथा चालकहरुको लापरवाहीका कारण सडक दुर्घटना बढीरहेको छ । दुर्घटना घटाउन ट्राफिक प्रहरीले ठाउँ ठाउँमा हम्प्स राख्ने गरेका छन् । भने कतिपय स्थानमा प्रहरीहरु ठूलो संख्यामा परिचालित हुने गरेका छन् ।
तर मोरङको डाँगिहाट ५ स्थित लक्ष्मिमार्गमा भने दुर्घटना न्युनिकरणको लागि पुराण लगाइएको छ । पछिल्ला पाँच वर्षको अवधिमा ६३ जनाको ज्यान जानेगरी सो स्थानमा सवारी दुर्घटना भएको स्थानिय बताउँछन् ।
पुराणको मुख्य मण्डप अगाडी कलसमा दुर्घटनामा परि ज्यान गुमाएकाहरुको तस्विर पनि राखिएको छ । मन्दिर बनाउन सहयोग गर्ने सबैलाई सम्मान गर्ने गरिएको आयोजकले बताएको छ । मन्दिर बनेपछि दुर्घटना त घट्यो तर यसलाई दैवी चमत्कार मान्ने वा नमान्ने ? अथवा के मान्ने ?