चालू आर्थिक वर्षको अर्धवार्षिक तथ्यांकले वाणिज्य बैंक पहिलेजस्तो बढी नाफा कमाउने अवस्थामा नरहेको देखाएको छ । आव ०६८/६९ को पहिलो ६ महिनामा वाणिज्य बैंकको कुल नाफा ५ अर्ब ४२ करोड रुपैयाँ छ । यो अघिल्लो वर्षको यही अवधिभन्दा २५.९७ प्रतिशतले कम हो । गत वर्ष यो अवधिमा वाणिज्य बैंकले ७ अर्ब ३३ करोड रुपैयाँ नाफा गरेका थिए ।
खराब कर्जा बढेकाले यसको प्रत्यक्ष असर नाफामा परेका हो । यो अवधिमा बैंकको निक्षेप पनि बढेको छ । तर, ऋण तथा लगानी भने सामान्य वृद्धि भएको छ ।
हाल ३२ वाणिज्य बैंक सञ्चालनमा छन् । सानिमा बैंक यसै महिना विकास बैंकबाट स्तरोन्नति भएको हो । गत आवको यो अवधिमा ३० वाणिज्य बैंक सञ्चालनमा थिए । सेन्चुरी कर्मसियल बैंकले गत फागुन २६ देखि वित्तीय कारोबार सुरु गरेको थियो ।
एक वर्षअघि कारोबार सुरु गरेका जनता, मेगा, सिभिल र सेन्चुरी बैंक नाफामा छैनन् । राष्ट्रिय वाणिज्य, नेपाल इन्भेस्टमेन्ट, नेपाल बंगलादेश, बैंक अफ काठमाण्डूलगायतको खुद नाफा घटेको छ ।
६ महिनामा सबैभन्दा धेरै कृषि विकास बैंकले ६६ करोड ८२ लाख खुद नाफा गरेको छ । उसले गत आवको यही अवधिमा ६५ करोड ४९ लाख खुद नाफा गरेको थियो । सेन्चुरीको खुद नाफा १ करोड ५२ लाख १३ हजार ऋणात्मक छ ।
बैंकहरूले प्रकाशित गरेको पुससम्मको अपरिस्कृत वित्तीय विवरणअनुसार निक्षेप करिब साढे २१.३८ प्रतिशतले बढेको छ । बैंकसँग कुल निक्षेप ७ खर्ब ६१ अर्व १९ करोड छ । पुससम्म सरकारी स्वामित्वको राष्ट्रिय वााणिज्य बैंकले सबैभन्दा धेरै ७५ अर्ब ३१ करोड निक्षेप संकलन गरेको छ ।
बैंकहरूको निक्षेपको अनुपातमा ऋण प्रवाह भने बढ्न सकेको छैन । गत आवको पुससम्म ५ खर्ब ३ अर्ब ८८ करोड ऋण लगानी दरलाई ४.९८ प्रतिशतले बढाएका छन् । यो अवधिमा बैंकहरूले ५ खर्ब २९ अर्ब ऋण लगानी गरेका छन् । पुससम्म बढी ऋण प्रवाह गर्नेमा नबिल बैंक अगाडि छ । उसले ४१ अर्ब ६१ करोड ६४ लाख कर्जा प्रवाह गरेको छ । सेन्चुरीले सबैभन्दा थोरै १ अर्ब ९० करोड ३६ लाख रुपैयाँ ऋण लगानी गरेको छ ।
बैंकहरूको लगानी भने यो अवधिमा २३.६७ प्रतिशतले बढेको छ । गत आवको पुससम्म १ खर्ब ३२ अर्ब ३३ करोड लगानी गरेका बैंकहरूले यो अवधिमा बढाएर १ खर्ब ६३ अर्व ६५ करोड पु¥याएका छन् । सबैभन्दा धेरै राष्ट्रिय वााणिज्य बैंकले २१ अर्ब ७२ करोड र सबैभन्दा थोरै सेन्चुरीले ४६ करोड २१ लाख लगानी गरेका छन् ।
पुससम्म कृषि विकास बैंकको सञ्चित कोषमा ४ अर्ब ४८ करोड जम्मा छ । राष्ट्रिय वााणिज्यको सञ्चित कोष ९ अर्ब २५ करोड २१ लाख र नेपाल बैंकको ४ अर्ब ५९ करोड ३५ लाख रुपैयाँ ऋणात्मक छ । falgun 21, karobar daily