द्वन्द कालमा माओवादीको आक्रमणका कारण ध्वस्त बनेको मोरंगको केराबारीस्थित इलाका प्रहरी कार्यालय केराबारीको भवन आठ वर्ष बितिसक्दा पनि पुनर्निर्माण हुन नसक्दा प्रहरी कार्यालय घर भाडामा लिएर सञ्चालनमा छ । पर्याप्त कोठाको अभाव र राम्रो सुरक्षा व्यवस्था विनाको प्रहरी कार्यालयका कारण प्रशासनिक काम सञ्चालन गर्न गाह्रो भएको सइ नातीबाबु बस्नेतले बताए ।
मासिक चार हजार ८०० रुपैया तिरेर घर भाडामा लिएर कार्यालय सञ्चालनमा छ । गाउँको बिचमा प्रहरी कार्यालय आफै असुरक्षित छ र सरकारी सहयोगको आशामा छ भने स्थानिय राजनीतिक दलका नेताहरु समेत प्रहरी कार्यालय पुनर्निर्माण गर्नुपर्ने माग गर्छन् ।
हालको यो प्रहरी कार्यालयमा हतपती कसैलाई हिरासतमा राखिँदैन । रातारात बेलबारी प्रहरी कार्यालय पु¥याइन्छ । राख्नैपर्ने अवस्थामा प्यासेज र प्रहरी जवानहरु सुत्ने कोठालाई नै प्रयोग गर्नुपर्ने बाध्यता छ । प्रहरी कार्यालय पुनर्निर्माणको लागि शान्ती मन्त्रीबाट आश्वासन पाएपनि गाविस र प्रहरी कार्यालयको लागि बजेट मागिएकोमा गाविसको लागि मात्र बजेट आएको नेकपा एमाले गाउँ कमिटि अध्यक्ष जंगराज भुजेलले बताए ।

केराबारी गाविस सहित याङ्शिला, सिंहदेवी, भोगटेनी र पाटी गाविस हेर्नुपर्ने यो प्रहरी कार्यालयमा ११ जना मात्र प्रहरीहरु छन् । प्रहरीको अपर्याप्तता र असुरक्षित कार्यालयका कारण प्रहरी आफै असुरक्षित छन् ।