प्रहरीले चन्दा आतंकको आरोपमा मंगलबार सुनसरीको धरानबाट संयुक्त जातिय मुक्ति मोर्चाका पाँच जना स्थानिय नेता तथा कार्यकर्तालाई पक्राउ ग¥यो । पक्राउ गर्नेमध्ये एक हुन् दुर्गाधन राई । साथीहरुले उनलाई सागर उपनाम दिएका छन् । तर उनलाई उपनाम किन दिइयो र आफू के गर्नका लागि संगठनमा आबद्ध रहेको हो भन्ने बारे समेत स्पष्ट थाहा पाउँदैनन् ।
खोटाङ बासापानी बस्ने उनले आफूलाई सामाजिक काम गर्न भन्दै संगठनको सदस्यता दिइएको बताए । ‘मलाई त राम्रो, सामाजिक काम हो भन्दै सदस्य बनाए ।’ साथीभाइले बनौं भनेपछि सदस्य बनेको जनाउँदै उनले भने, ‘यसरी चन्दा उठाउने, धम्की दिने भन्ने त के थाहा ?’

मोर्चा कार्यकर्ताले पहिचानको लागि प्रयोग गर्ने सेतो क्याप

साथीको लहै लहैमा आएका उनले धरानका व्यवशायी चन्द्र खाम्पुङसँग मंगलबार उनको घरमै पुगेर सहकर्मीहरुले चन्दा माग गरेपछि मात्र आफू आबद्ध भएको संगठनको बारेमा थाहा पाए । तर त्यतीबेला निकै ढिलो भइसकेको थियो । उनलाई चन्दा आतंकको आरोपमा हतकडी लगाउन प्रहरीहरु व्यवशायीको घर बाहिर तयार भएर बसिसकेका थिए ।
‘हामी निस्कीने बित्तिकै बाहिर धेरै मान्छे जम्मा भएका थिए, मुन्द्रा लगाएका मानिस पनि थिए ।’ उनले भने, ‘ती मानिससँगै सादा पोशाकमा प्रहरीहरु पनि थिए, हामीलाइ पक्राउ गरे ।’

दुर्गाधन राई

राईको भनाइले नै सो संगठनमा लहैलहैमा धेरै मानिस आबद्ध भएको समेत खुलासा भएको छ । प्रहरीले पक्राउ गरेका जगत विक समेत मलेसियाबाट घर फर्किएको सात दिन मात्र भयो । यता दिल मगर समेत दुई हप्ता अघि मात्र संगठनमा आबद्ध भएको प्रहरीले जनाएको छ । छोटो समयमा धेरै धन कमाउने उदेश्यले यस्ता संगठनको गतिविधि बढ्दै गएको सुनसरी प्रहरी प्रमुख  राजु मानन्धरले जनाए ।
मंगलबार विहान सुनसरीको धरानका व्यवशायी चन्द्र खाम्पुङसँग चन्दा माग गरेर फर्कँदै गरेको अवस्थामा उनीहरुलाई रंगेहात पक्राउ गरीएको मानन्धरले जनाउनुभयो ।
सरकारसँग वार्ताको अवस्थामा रहेपनि विभिन्न आतंककारी गतिविधिमा संलग्न हुँदै आएको यो समुहका पक्राउ पर्ने व्यक्तिहरुमा वार्ता टोली सदस्य अविरल भनिने नरेश विक, पासाङ भनिने जगत विक, सुनसरी इन्चार्ज प्रविन भनिने कृष्ण लिम्बु, युवा मोर्चा केन्द्रिय सदस्य प्रभात भनिने दिल मगर र सागर भनिने दुर्गाधन राई छन् ।
उनीहरुले धरानका व्यवशायीसँग दश लाखसम्म चन्दा माग गरेका पत्रहरु फेला परेको प्रहरीले जनाएको छ ।

मोर्चा कार्यकर्ता सहित भीमसिंह पक्राउपछि दंग छन् एसपी मानन्धर

पक्राउ परेका वार्ता समिति सदस्य अविरलले भने चन्दा माग्न गएको आरोपको खण्डन गरेका छन् । उनले आफूहरु माफी माग्न गएको बताउँदै प्रहरीले बरामद गरेको चन्दा मागेको पत्र पुरानो भएको समेत जनाएका छन् ।
प्रहरीले र्याखर्याखती पारेपछि मात्र उनीहरुले धरानका विभिन्न व्यवशायीहरुसँग चन्दा माग गरेको स्वीकार गरेका थिए । सरकारसँगको वार्ता प्रक्रियामा रहेका बेलामा पनि सो संगठनले चन्दा आतंक मच्चाएको गुनासोका आधारमा प्रहरीले गोप्य अनुसन्धान गरिरहेको थियो । रंगेहात फेला पारेपछि पाँचै जनालाई अपहरण तथा शरीर बन्धक मुद्धा दर्ता गरिएको प्रहरी प्रमुख मानन्धरले जानकारी दिनुभयो ।

धरानका व्यापारीँग सात लाख मागिएको मोर्चाको पत्र

वार्ता समिति सदस्य सहित आफ्ना नेता तथा कार्यकर्तालाई प्रहरीले पक्राउ गरेको भन्दै केही समय अघि मोर्चाले पुर्वाञ्चल बन्दको समेत आह्वान गरेको थियो । प्रहरीले झुटा मुद्धा लगाइ धरपकड गरेको आरोप प्रहरीलाई लगाउन थालेपछि प्रहरीले रंगेहात समातेर मुद्धा चलाएको हो ।
मोर्चाको चन्दा आतंक विरुद्ध चन्द्र खाम्पुङले मुद्धा दर्ता गराएको जनाउँदै अन्य आधा दर्जन बढी व्यशवायीहरुले समेत मुद्धा दर्ता गर्ने तयारी गरिरहेको डिएसपी यमुना रकजले जनाउनुभयो ।
असोज ५, पूर्वन्युज
प्रतिक्रिया दिनुहोस् >>